以下是本會會長陳家豪先生以雲端與運算專業人士協會會長身份接受東方日報的報道。

眾所周知，航空公司對飛機師嘅取錄要求甚為嚴格。香港模具及產品科技協會理事長陳鑑光，本身酷愛飛行之餘，又長期贊助香港青年航空學會，對航空界嘅狀況亦有相當掌握。佢話流利英語同優秀學歷固然重要，但欠缺Soft Skills（軟技巧）的話，得到航空公司僱用嘅機會就好微。咦，咁到底乜嘢係軟技巧呢？

解釋何謂軟技巧之前，陳鑑光先講一則有關軟技巧嘅測試，就係一幅有飛機、有煙、與乘客攜帶行李嘅畫面，觀看片刻之後考官收起圖像，然後要學員用言語描述，結果唔少人嘅描述若非加插個人臆測，就係太過粗略，能夠恰當交代畫面事物者為數有限。陳鑑光話有賴機組人員嘅通力配合，航機得以安全操作，而客觀同準確咁向同事匯報情況，就相當重要。換言之，懂得人際溝通，係軟技巧嘅要點。

陳家豪：只追求分數 跟不上時代

香港電器業協會前理事李國豪，指待人接物並無固定模式，溝通上若能因應不同對象而作出相應調整，喺職場上會較為有利。佢又話一個團體之內，每個人嘅利益同價值觀都各異，咁就更需要透過軟技巧來促進大家嘅溝通同合作，謀求共贏。

雲端與運算專業人士協會會長陳家豪（Emil），指可以透過死記硬背而獲取嘅知識技能，以及依循指引同程序辦事者，可以歸納為Hard Skills（硬技能）；至於要憑意會、難以言傳者，就屬於軟技巧嘅範疇。醫生、律師或會計師嘅訓練，除吸取書本知識，還需走出課堂跟隨師傅實習，就係要藉實踐經驗嚟學習軟技巧。雖然當今社會，軟技巧日益重要，但港人一味追求分數嘅風氣，未必追得上時代。

Emil舉例話政府向來只着重吸納成績最好嘅大學畢業生，然而年年考第一嘅高材生竟然連廁紙都唔識得買，如此高分低能，要政通人和實屬奢望。Emil認為年輕人不但要擴闊生活圈子，亦要精通多項專業，當涉獵嘅範疇愈深愈廣，有助提升個人嘅軟技巧。

相關原文及出處請點擊此處查看。