香港表廠商會新一屆嘅會董會就職，高偉國成為歷來最年輕嘅會長。識飲識食嘅佢唔單止幫手打理家族生意，亦有經營餐廳食肆。講到做飲食業，好多人都想喺人流暢旺嘅地區搵個舖位，但係佢就寧願揀選比較冷門嘅地區如黃竹坑，到底係乜嘢原因呢？
高偉國解釋，旺角或銅鑼灣等區域無疑係「旺丁」，但同時亦係食肆林立之地，加上旺區舖租高昂，成本開支係沉重負擔，所以佢寧願喺一啲無咁旺，但又有需求潛力嘅地方開餐廳。佢又話拜外婆高明嘅廚藝所賜，令佢自小練就靈敏嘅味蕾，就連唔同街市購買嘅五花腩都食得出有分別，因此經營餐廳，對食材嘅要求特別高，譬如越南牛河，佢試過巴西同澳洲牛肉之後，都係覺得美國牛肉最適合。
陳龍盛大讚無揀錯
卓妮喺場內遇到菁英會會員事務委員會副主任陳龍盛，佢幫襯過高偉國經營嘅餐廳，亦覺得無揀錯地點。本身經營電競館嘅陳龍盛話地舖租金太高，令到唔少人選擇租金相對較廉嘅樓上舖，依家又發現部分銀行同飲食連鎖店亦有「上樓」，連帶樓上舖嘅租金亦都水漲船高。

陳龍盛話依家街頭抗爭持續不斷令遊客卻步，好多行業嘅生意一落千丈，而經營者同業主簽約前，都無法預計今日嘅香港會遭遇突如其來嘅政治大風暴，因此經營者都期望業主可以通融吓，否則經營者無法渡過難關，亦唔見得對業主有利。

轉頭又見到香港鐘表業總會主席李永安同雲端與流動運算專業人士協會會長陳家豪。身為IT達人嘅陳家豪話儘管網購已成潮流，但由於品牌經營往往需要開設「體驗店」，畀消費者接觸過實物之後再通過網上渠道購買，所以就算進入新經濟時代，仍需要充足嘅舖位嚟滿足商業經營。

卓妮

相關原文及出處請點擊此處：https://orientaldaily.on.cc/cnt/news/20190906/mobile/odn-20190906-0906_00176_074.html